ၵၢၼ်တႆးၼႆႉ ပဵၼ်ပုၼ်ႈၽွၼ်းၽႂ်

                       

                       ၵၢၼ်တႆးၼႆႉ ႁဝ်းႁႃးတေဝႆႉပၼ် ပုၼ်ႈၽွၼ်းၽႂ်ႁဵတ်း??? ဢမ်ႇၼၼ် တေမုင်ႈမွင်းႁႂ်ႈပိူၼ်ႈမႃးႁဵတ်းပၼ်ႁိုဝ် ??? ဢမ်ႇၼၼ် ပႂ်ႉလႅမ်းၵိၼ်ၼႂ်းၵႄႈၵၢင်မၼ်းႁိုဝ်??? ဢမ်ႇၼၼ် တေဢွၼ် ၵၼ်ပွႆႇပႅတ်ႈဝၢၼ်ႈၵိူတ်ႇမိူင်းၼွၼ်းတူဝ်ၸဝ်ႈၵဝ်ႇသေ ၵႂႃႇယူႇလွတ်ႈ ၵတ်းၵတ်းယဵၼ်ယဵၼ်ယူႇမိူင်းပိူၼ်ႈႁိုဝ်? ၵၢၼ်တႆးၼႆႉ ပၢၼ်သိုပ်ႇပၢၼ် လၢၼ်သိုပ်ႇလၢၼ် လုၵ်ႈသိုပ်ႇလုၵ်ႈ ဢၼ်ႁဵတ်းမႃး တေႃႇထိုင် ပၢၼ်ၼႆႉၵေႃႈတိုၵ်ႉႁၼ်မိူၼ်ၵဝ်ႇယူႇၵူၺ်းလႄႈ ဢမ်ႇပႆႇမုင်ႈႁၼ် သၢႆလႅင်းဢွၼ်ႇတၢင်းၼႃႈလႄႈ တႆးဝၼ်းမိူဝ်ႈၼႆႉ ဢွၼ်ၵၼ် ၸႂ်တူၵ်း ၸႂ်သဵင်ႈမႃး ၼိူဝ်ၵၢၼ်တႆး ဢမ်ႇၼၼ် ၵၢၼ်ပဵၼ်တႆးၼႆႉယဝ်ႉႁိုဝ်ၼေႃ။ ပေႃးတေၶိုၼ်းတွပ်ႇဝႃႈၵေႃႈ ၸႂ်ႈယဝ်ႉ ၵူၼ်းၼုမ်ႇတႆး ဝၼ်းမိူဝ်ႈၼႆႉ ၽိူဝ်ႇသေၺႃးၵွႆးၾႆးၶဝ်ႈတႃႈ သမ်ႉလႆႈမႃးထုၵ်ႇၺႃးဢဝ်မၢၼ်ႇတႃ လမ်သႂ်ႇထႅင်ႈၼၼ်ႉ ႁိုဝ်တေၸၢင်ႈႁၼ်လႅင်းလႆႈတေႉတေႉယဝ်ႉ။

                         ၵၢၼ်တႆးၼႆႉ တႆးတေလႆႈႁဵတ်း တႆးတေလႆႈၶဝ်ႈႁူမ်ႈၵူႈၽၢႆႇၽၢႆႇလႄႈ ဢွၼ်တူင်ႉၼိုင်ႁဵတ်းသၢင်ႈ ယၢမ်းလဵဝ် ႁဝ်းယႃႇပေဢွၼ်ၵၼ်ဝူၼ်ႉႁၼ်ထိုင်ဝႃႈ ၵွပ်ႈသိုၵ်းတႆး ယိုဝ်းၵၼ် ၵွပ်ႈသိုၵ်းဢမ်ႇၶဝ်ႈၵၼ် ၵၢၼ်မိူင်းၵေႃႈ ဢမ်ႇႁၼ်ဢွၼ်တူင်ႉၼိုင်သင် ဢမ်ႇႁၼ်ၶဝ်ဢွၵ်ႇမႃးလၢတ်ႈသင် ၼႆသေ ၼႄးၵဝ်ၼႄးမႂ်းၵၼ် ယူႇယဝ်ႉ. လုၵ်ႉတီႈ တူဝ်ၸဝ်ႈၵဝ်ႇ ႁဵတ်းပဵၼ်လႆႈၸိူင်ႉႁိုဝ်ၵေႃႈ လုၵ်ႉႁဵတ်းၵႂႃႇၼၼ်ႉလီတေႉတေႉယဝ်ႉ။

• တႆးႁဝ်းဝၼ်းမိူဝ်ႈၼႆႉ

                        ယွၼ်ႉဢမ်ႇႁၢင်ႈႁႅၼ်း ဢမ်ႇဢွၼ်ၵၼ်ႁဵတ်းသၢင်ႈဝႆႉ ဝၼ်းလင်လႄႈ ဝၼ်းမိူဝ်ႈၼႆႉ မိူင်းတႆးလႄႈ ၵူၼ်းမိူင်းတႆး ၸၢင်ႇလႆႈတုၵ်ႉၶ ယၢပ်ႇၽိုတ်ႇယဝ်ႉ။ ပေႃးမႃးတူၺ်း ၸၢဝ်းၶိူဝ်းဢွၼ်ႇၶဝ် ဢွၼ်ၵၼ် လုၵ်ႉတူင်ႉၼိုင် ႁဵတ်းသၢင်ႈၵၢၼ်ၶိူဝ်းတူဝ်ၵဝ်ႇၶဝ် မႃးႁၢဝ်ႉႁၢဝ်ႉႁႅင်းႁႅင်းသေ ပေႃးၶၢမ်ႇပူၼ်ႉ ပီႈဢၢႆႈလူင် ၶဝ်ဢၼ်ဢွၼ်ၵၼ်ႁွင်ႉမႃးဝႃႈ တႆး ၼႆၼၼ်ႉယဝ်ႉႁိုဝ်၊ ၵၢၼ်ပိူၼ်ႈ ပိူၼ်ႈတေႁဵတ်းၼၼ်ႉ ပဵၼ်ၾိင်ႈပိူင်ပိူၼ်ႈယဝ်ႉ ၵၢၼ်တႆး တႆးႁဝ်းဢမ်ႇႁဵတ်းၼၼ်ႉတေႉ မၼ်းၶႆႈၽိတ်းပိူင်ႈဢိတ်းဢိတ်းယူႇ။

                        ပေႃးဢဝ်ပိုၼ်းဝၼ်းလင်မႃး ဝႃႈတႆးၼႆႉ ပဵၼ်ၶိူဝ်းၸဝ်ႈၶိူဝ်းၶုၼ် ၶိူဝ်းၶုၼ်သၢင် ၶိူဝ်းသိူဝ်ၶၢၼ်ၾႃႉ ၶိူဝ်းမိူင်းႁေႃသႅင်လူင် ၶိူဝ်းလၢၼ်ႉၸဝ်ႈလူင် လၢတ်ႈလူင်ၵႂႃႇ ၶႆႇလူင်ၵႂႃႇ လဵၿ်ႈႁဵၼ်းလူင်ၵႂႃႇ ငိၼ်းလူင်ၵႂႃႇၵူႈၽၢႆႇၽၢႆႇ ၵူႈတၢင်းတၢင်းသေ ပေႃးမႃး တူၺ်းဝၼ်းမိူဝ်ႈၼႆႉ တႆးမီးပိုၼ်းဝၼ်းလင်ၵူၺ်း ပိုၼ်းဝၼ်းၼႃႈလႄႈ ပိုၼ်းဢၼ်တေမႃးၼၼ်ႉ  တႃႇတေသၢင်ႈ ႁႂ်ႈၶိူဝ်းတႆး ၵူၼ်းမိူင်းတႆးၸိူဝ်ႉၶိူဝ်းတႆး ႁႅင်းယႂ်ႇၶိုၼ်ႈမႃးလႆႈမိူၼ် ပၢၼ်ပဵၼ်မႃး ပိုၼ်းဝၼ်းလင်ၼၼ်ႉ လႆႈ ႁၼ်ထိုင်ဝႃႈ ထိုင်ၶၢဝ်းယၢမ်း ၵူၼ်းၼုမ်ႇႁဝ်း ထုၵ်ႇလီဢွၼ်ၵၼ်တူင်ႉတိုၼ်ႁဵတ်းသၢင်ႈယဝ်ႉ။ ပေႃးတေၵုမ်ႇ ဢွၼ်ၵၼ်ပၢႆႈ ဢွၼ်ၵၼ်ၸႂ်တူၵ်းၸွမ်းလွင်ႈ ဝၼ်းမိူဝ်ႈၼႆႉၼႆႉၸိုင် မိူဝ်းၼႃႈမၼ်း ၼိုင်ၶႅၼ်းတေၼႃႈလိူဝ်သေၼႆႉထႅင်ႈ။

• တူင်ႉတိုၼ်ႇတႃႇတႆး

                        ၵၢၼ်တႆး ႁဵတ်းၵၢၼ်တႆးၼႆႉ ဢမ်ႇၸႂ်ႈဝႃႈ ဢမ်ႇလႆႈမၢႆထိုင်ဝႃႈ ၶဝ်ႈႁဵတ်းၵၢၼ်ပႃႇတီႇ ၶဝ်ႈႁဵတ်းသိုၵ်းသေယိပ်းၵွင်ႈမဵဝ်းလဵဝ်ၵူၺ်း။ ၵၢၼ်တႆးဢၼ်ဝႃႈၼႆႉ ယူႇၼႂ်းႁိူၼ်း ႁႂ်ႈၵမ်ႉႁိူၼ်း ယူႇၼႂ်းဝၢၼ်ႈႁႂ်ႈၵမ်ႉဝၢၼ်ႈ ယူႇၼႂ်းဢိူင်ႇႁႂ်ႈၵမ်ႉဢိူင်ႇ တွၼ်ႈတႃႇ တီႈယူႇတၼ်းသဝ်းႁဝ်း ပေႃးတေမီးလွင်ႈၶိုၼ်ႈယႂ်ႇ မၢၵ်ႇမီးလီပဵၼ်ၼၼ်ႉ ဢွၼ်ၵၼ်ပူၵ်းပွင်ႁဵတ်းသၢင်ႈၵေႃႈ ပဵၼ်ၵၢၼ်တႆးႁဝ်းယဝ်ႉ ထႅင်ႈလွင်ႈၼိုင် ဢွၼ်ၵၼ်ၵေႃႇသၢင်ႈ ၵျွင်း ဝတ်ႉဝႃးၽႃႇသိူဝ်ႇ ၵွင်းမူး ၸိူဝ်းၼႆႉၵေႃႈ မၼ်းပဵၼ်ၵၢၼ်တႆး ၾၢင်ႈႁၢင်ႈၾိင်ႈမိုဝ်းလၢႆးမိုဝ်းတႆး ပဵၼ် လွၵ်းလၢႆးၵၢၼ်တေႃႇသူႈၽၢႆႇပၢႆးသႃႇသၼႃႇၼၼ်ႉယဝ်ႉ။

                        လုၵ်ႉတီႈ ၵျွင်း ဝတ်းဝႃးၽႃႇသိူဝ်ႇ ၵွင်းမူးသေ သၢင်ႈႁႂ်ႈမၼ်းပဵၼ် ႁွႆးမိုဝ်းတႆး တႅမ်ႈလိၵ်ႈတႆး သႂ်ႇၾိင်ႈထုင်းတႆးလႄႈ ပၼ်တိုဝ်ႉတၢင်းၵူၼ်းဝၢၼ်ႈၵူၼ်းသူၼ် ၶဝ် သွၼ်လိၵ်ႈတႆး ႁဵတ်းၵၢၼ်ပူၵ်းပွင် ၽႃႇသႃႇလိၵ်ႈလၢႆးတႆးၸိူဝ်းၼႆႉၵေႃႈ မၼ်းပဵၼ်ၵၢၼ်တူင်ႉတိုၼ်ႇတႃႇ တႆးၼိုင်ႈမဵဝ်းယဝ်ႉ။ ၵၢၼ်ၽႂ် ၵၢၼ်မၼ်း ၶၢဝ်းယၢမ်းၼႆႉ ၽႂ်မေႃသင်ၵေႃႈ တေလႆႈႁဵတ်းၼၼ်ႉၵူၺ်း ဢမ်ႇၸႂ်ႈၶၢဝ်းယၢမ်း ႁဝ်းတေလႆႈမႃးသႄႉၵၼ်ၼႄးၵၼ်ယူႇ။ ၽွင်းယၢမ်းပိူၼ်ႈလုၵ်ႉၵႂႃႇႁႃ ႁဵတ်းၵၢၼ်ၼၼ်ႉ ႁဝ်းယႃႇပေၵုမ်ႇတိုၵ်ႉၼွၼ်းၾၼ်ႁၼ်လီ ၶိုၼ်ႈမိူင်းၽီယူႇတိၵ်းတိၵ်းၵူၺ်း ထိုင်ၶၢဝ်းႁဝ်းတေ လႆႈတူင်ႉတိုၼ်ႇသၢၼ်မိုဝ်းၵွင်ႉၶေႃးၵၼ်ယဝ်ႉ။ ၸိူဝ်းမီးငိုၼ်းၸွႆႈငိုၼ်း ၸိူဝ်းမီးပၺ်ႇၺႃႇ ၸွႆႈၵၢၼ်ပၢႆးပၺ်ႇၺႃႇ ၸိူဝ်းမီး Theory ၵၢၼ်မိူင်း ၶဝ်ႈလဵၼ်ႈၵၢၼ်မိူင်း ပူၵ်းတိုၼ်ႇၵူၼ်းၼႂ်းပႃႇတီႇ ႁႂ်ႈမီးႁႅင်းၸႂ်ၶိုၼ်ႈမႃး

လၢတ်ႈၵႂၢမ်းၼမ်ၼမ်လႄႈ လုၵ်ႉႁဵတ်းႁတ်းႁဵတ်းလွင်ႈမၢၼ်ႇမႅၼ်ႈ တွၼ်ႈတႃႇတႆး. ၸိူဝ်းမီးပၢႆးဝူၼ်ႉပႃးၸႂ် ၽၢႆႇပၢႆးတိုၵ်းၵေႃႈ ၶဝ်ႈႁူမ်ႈၽၢႆႇၵၢၼ်သိုၵ်း ၸီးၼႄသဵၼ်ႈတၢင်းလူင် ႁႂ်ႈထိုင်ယိူင်းမၢႆ တွၼ်ႈတႃႇတႆးႁဝ်း ႁူႉႁၼ်တီႈလႅင်းလႄႈ ႁႂ်ႈၵူၼ်းၼုမ်ႇတႆး မီးႁႅင်း ၵူၼ်းထဝ်ႈၵူၼ်းယႂ်ႇ ႁႂ်ႈပေႃးလႆႈပိုင်ႇဢိင်. ၸိူဝ်းမီးပၢႆးဝူၼ်ႉ ၽၢႆႇၵႃႉၶၢႆၵေႃႈ ၵႃႉၶၢႆ ယႃႇပေဝႆႉမႃႇၼတေႃႇၵၼ်လႄႈ ၶႂ်ႈၵိၼ်ၸိၵ်းတွၵ်ႇၸွၵ်းၼိူဝ်ၵၼ်။ ဝၼ်းမိူဝ်ႈၼႆႉ ႁဝ်းတေလႆႈတူင်ႉတိုၼ်ႇ ႁဵတ်းသၢင်ႈ ၼမ်လိူဝ်သေ မိူဝ်ႈပူၼ်ႉမႃး ၵၢၼ်တႆးယႃႇပေဝႆႉဝႃႈ ပဵၼ်ပုၼ်ႈၽွၼ်းၵဝ်ႇၵဝ်ႇမႂ်းမႂ်း ၵၢၼ်မိူင်းယႃႇပေဝႆႉဝႃႈ ပဵၼ်ပုၼ်ႈၽွၼ်းပႃႇတီႇတႆး ၵၢၼ်ၵႅတ်ႇၶႄႇ ယႃႇပေဝႆႉၸႂ်ဝႃႈ ပဵၼ်ပုၼ်ႈၽွၼ်း ၽၢႆႇသိုၵ်း ၵၢၼ်ပူၵ်းပွင် ၵၢၼ်ငမ်းယဵၼ် ယႃႇပေဝႆႉၸႂ်ဝႃႈ ပဵၼ်ၵူၼ်းလဵၼ်ႈၵၢၼ်မိူင်းၶဝ်ၼႆၵူၺ်း ႁဝ်းႁႃးၵူႈၵေႃႈ မီးပုၼ်ႈၽွၼ်း ၼိူဝ်ႁူဝ်မႃႇၵၼ်ၵူႈၵေႃႉ ၵၢၼ်တႆး တိုၼ်းပဵၼ်တႆးတေလႆႈႁဵတ်းယဝ်ႉ။

• မိူင်းတႆးပဵၼ်သင်ယူႇ

                         မိူင်းတႆးဝၼ်းမိူဝ်ႈၼႆႉ ပဵၼ်သင်ယူႇၼႆ ဢမ်ႇလၢတ်ႈၵေႃႈတႆးႁူႉၵၼ်ၵူႈၵေႃႉ ၽႂ်လႅၼ်ၽႂ်ဢမ်ႇ လၢတ်ႈၵေႃႈတႆးႁူႉယူႇ ၽႂ်လႅတ်းၼိူဝ်ၽႂ်ၼႆၵေႃႈ ဢမ်ႇလၢတ်ႈၵေႃႈတႆးႁူႉယူႇ ၽႂ်ႁဵတ်းသင်တေႃႇတႆး ၽႂ်ယႃႉဝၢၼ်ႈယႃႉမိူင်းတႆး ဢမ်ႇလၢတ်ႈၵၼ်ၵေႃႈတႆးႁူႉယူႇ  တႆး တႆး တႆး တီႈတႆးႁူႉယူႇၵူႈလွင်ႈၼၼ်ႉ ယႃႇပေႁူႉဝႆႉ မဵဝ်းလဵဝ်ၵူၺ်း ႁဝ်းတေလႆႈဝူၼ်ႉၸွမ်းလႄႈ လုၵ်ႉႁဵတ်းသၢင်ႈပၼ် ပုၼ်ႈတႃႇဝၢၼ်ႈမိူင်းတႆးႁဝ်းယဝ်ႉ ဝၼ်းမိူဝ်ႈ သင်တႆးၽွမ်ႉၵၼ် ပဵၼ်ၼမ်ႉၼိုင်ႈၸႂ်လဵဝ်ၵၼ် ၵူၼ်းမိူင်းၵေႃႈ ၵမ်တႃမိုဝ်းၼႄလႆႈပိူၼ်ႈၼႆ ၽႂ်ၽႂ်ၵေႃႈ ဢမ်ႇႁတ်းႁဵတ်းသၢင်ႈ ပၼ်ႁႃသင်လူင်ၼႂ်းမိူင်းတႆးႁဝ်း ဝၼ်းမိူဝ်ႈၼႆႉ တႃႇမိုဝ်းဢၼ်ၵမ်တေႃႇၵၼ်ၼၼ်ႉ မိူင်းတႆး ပဵၼ်သင်ယူႇ ယုမ်ႇယမ်ဝႃႈႁူႉၵၼ်ၵူႈၵေႃႉ။

                     ၵၢၼ်တႆး ဢဝ်ၵွင်ႈတေႃႇၵွင်ႈ ဢဝ်လႅဝ်းတေႃႇလႅဝ်း ဢဝ်မိုဝ်းတေႃႇ မိုဝ်းထုပ်ႉၵၼ်မႃးၼၼ်ႉ ၽႂ်ဢမ်ႇမီးၽွၼ်းလီသင် လိုၼ်းသုတ်းမႃးၸဵပ်းၵၼ်ၵႂႃႇတၢင်းသွင်ၵေႃႉၵူၺ်း တႃႇမိုဝ်းလႄႈ ႁႅင်းတူဝ်ႁႅင်းမိုဝ်း ဢၼ်ဝႃႈၼၼ်ႉ တေလႆႈၸႂ်ႉတီႈမၼ်း ႁႂ်ႈမၼ်းထုၵ်ႇမႅၼ်ႈ ၸွမ်းငဝ်းလၢႆးလႄႈ ပုၼ်ႈၵူၼ်းတၢင်းၼမ်ၵၼ်ယူႇ။ မိုဝ်းဢၼ်ဝႃႈၼႆႉ ပေႃးႁဝ်းမေႃၸႂ်ႉတိုဝ်းတေႃႇၵၼ်ၵေႃႈ ဢၼ်ပဵၼ်ၽွၼ်းလီၵေႃႈ တေလႆႈႁၼ်မီးတၢင်းၼမ်ယူႇ တႃႇမိုဝ်းႁဝ်းဢၼ်ၵမ်တေႃႇၵၼ်ၼၼ်ႉ လူဝ်ႇမေႃဢဝ်ၵႂႃႇၸႂ်ႉတိုဝ်းတီႈ ၽူႈၸိူဝ်းမႃး ယႃႉၵဝ်း ဝၢၼ်ႈမိူင်းႁဝ်း ႁႂ်ႈပဵၼ်ၽိူၼ်း ပဵၼ်ၾႆးၼၼ်ႉၵူၺ်း။

                        မိုဝ်းတီႈႁဝ်းၵမ်တေႃႇၵၼ်လႄႈ မၢင်ၵၼ်ၼၼ်ႉ ပေႃးႁဝ်းမေႃၸႂ်ႉတိုဝ်းပဵၼ် မိုဝ်းယိုၼ်းၸူး ၵၼ်ၼႆ မၼ်းတေမီးၽွၼ်းလီတွၼ်ႈတႃႇၵူၼ်းတၢင်းၼမ်တေႉတေႉ။ ဝၼ်းမိူဝ်ႈၼႆႉ မိူင်းတႆးပဵၼ်သင်ယူႇ ႁူႉႁၼ်ၵၼ်ၵူႈၵေႃႉ မိူင်းတႆးပွတ်းႁွင်ႈပဵၼ်ၽိူၼ်းပဵၼ်ၾႆး တႆးဢမ်ႇလႆႈႁဵတ်းသင် ယူႇႁင်းၵူၺ်းၵေႃႈ လႆႈထုၵ်ႇၺႃးၶီႈသူမ်ႈပိူၼ်ႈ ၶူဝ်း ႁိူၼ်း ၵူၼ်း ဝၢၼ်ႈမိူင်းလူႉ သုၵ်ႉသၵ်ႉမႃးႁၢဝ်ႉႁၢဝ်ႉႁႅင်းႁႅင်း ဢၼ်တၢႆၵႂႃႇၵေႃႈ တၢႆၵႂႃႇပႅတ်ႈလၢႆလၢႆ ဢမ်ႇႁူႉတီႈပွင်ႇ ဢမ်ႇႁူႉလွင်ႈတၢင်းသင် တႆးဢမ်ႇလႆႈႁဵတ်းၽိတ်းသင်လႄႈ ၵူႈဝၼ်းဝၼ်း ယူႇႁိူၼ်းၸဝ်ႈၵဝ်ႇဝႆႉယူႇၵေႃႈ ၼႂ်းၸႂ်ၼႆႉ ဢမ်ႇမီးလွင်ႈတၢင်းသိူဝ်းလႄႈ လွင်ႈလွတ်ႈၽႄး   ၼွၼ်းယူႇၼိူဝ်ႁိူၼ်းလၢႆသိပ်းၸၼ်ႉ ၼွၼ်းယူႇၼိူဝ်ၵူႈ ၼိူဝ်ၽႃၶႅမ်ႉၶႅမ်ႉၵေႃႈ ဢမ်ႇႁူႉဝႃႈ ပိူၼ်ႈတေဢဝ်ဢီႇသင်မႃးပွႆႇသႂ်ႇႁိူၼ်းႁဝ်း တီႈယူႇႁဝ်းမိူဝ်ႈလႂ်ၼႆသေ ဝူၼ်ႉယဝ်ႉ ဢဝ်မီးၸႂ် ၵူဝ်ၵႂႃႇၵေႃႈ ႁၼ်မီးတၢင်းၼမ် လွင်ႈၸိူဝ်းၼႆႉ ယွၼ်ႉၵွပ်ႈသင်? ႁဝ်းသမ်ႉလူဝ်ႇႁဵတ်းသင်?

• လွင်ႈၵတ်းယဵၼ်ၼႆႉမီးတီႈလႂ်

                        လွင်ႈၵတ်းယဵၼ်တွၼ်ႈတႃႇ မိူင်းတႆးၼႆႉ မၼ်းမီးၼႂ်းၵႂၢမ်းလႄႈ ၽႅင်းၵႂၢမ်းၵူၺ်း ပေႃးတၢင်းၼွၵ်ႈ လွင်ႈပိူင်ပဵၼ်တေႉမၼ်းတေႉ ၵူၼ်းမိူင်းတႆးပဵၼ်ၼမ်ႉႁူၼမ်ႉတႃၵၼ်လၢႆလၢႆယဝ်ႉ။ လွင်ႈၵတ်းယဵၼ် ၼႆႉႁၢႆၵႂႃႇလႂ် မီးတီႈလႂ် ပေႃးတေဢွၼ်ၵၼ်ထၢမ်ႇမႃးၸိုင် မီးၼႂ်းမိုဝ်းၵူၼ်းတႆးႁဝ်းၵူႈၵေႃႉၵူၺ်း ယွၼ်ႉၼၼ် ၵၢၼ်တႆးၼႆႉ ပဵၼ်ပုၼ်ႈၽွၼ်းတႆးႁဝ်းၵူႈၵေႃႉလႄႈ မီးၼႂ်းမိုဝ်းႁဝ်းၵူႈၵေႃႉ ဢမ်ႇၸႂ်ႈဝႃႈ မီးၼႂ်းမိုဝ်းၽႂ်မီးၼႂ်းမိုဝ်းပိူၼ်ႈသင် မီးၼႂ်းမိုဝ်းႁဝ်းၵူႈၵေႃႉၵူၺ်း။

                        လွင်ႈၵတ်းယဵၼ်ၼႆႉ ၽႂ်ၽႂ်ၵေႃႈၶႂ်ႈလႆႈ ၽႂ်ၽႂ်ၵေႃႈ မုင်ႈမွင်း ၽႂ်ၽႂ်ၵေႃႈၶႂ်ႈယူႇ ယွၼ်ႉၼၼ်လႄႈ ၸိုဝ်ႈဢၼ်ဢွၼ်ၵၼ်ႁွင်ႉဝႃႈ တႆး ၼႆယူႇၼႆႉ တီႈပွင်ႇမၼ်းဝႃႈ ၵျိုၵ်ႈလွင်ႈၵတ်းယဵၼ် ၼႆဝႆႉယူႇ။ ပေႃးမႃးတူၺ်း လွင်ႈၵတ်းယဵၼ်လႄႈ လွင်ႈယူႇသၢင်ႈၵိၼ်သဝ်း မီးလွင်ႈလွတ်ႈၽႄးလီယဝ်ႉၼႄႇၼႆ ဢမ်ႇပႆႇလႆႈႁၼ်မီး ယွၼ်ႉဢိင်ႇၼိူဝ်ငဝ်းလၢႆးၵူႈလွင်ႈလွင်ႈ မိူဝ်ႈဝၼ်းလင် ႁဝ်းဢမ်ႇဢွၼ်ၵၼ်ႁဵတ်းသၢင်ႈဝႆႉလႄႈ ဝၼ်းမိူဝ်ႈၼႆႉ ႁဝ်းၸၢင်ႇလႆႈမႃးၺႃး ၽွၼ်းႁၢႆႉလွင်ႈတုမ်ႉယွၼ်ႈမၼ်း ဝၼ်းမိူဝ်ႈၼႆႉယဝ်ႉ။ 

• ယိူင်းဢၢၼ်းၼႂ်းၸႂ်ၵူႈၵေႃႉ

                        ယိူင်းဢၢၼ်းၼႂ်းၸႂ် ၵူၼ်းႁဝ်းၵူႈၵေႃႉဝၼ်းမိူဝ်ႈၼႆႉ ၶႂ်ႈႁႂ်ႈမိူင်းတႆးမီးလွင်ႈၵတ်းယဵၼ်လႄႈ ႁၵ်ႉႁွမ် ၽွမ်ႉသဵင်ပဵင်းပၢၵ်ႇၵၼ်ၵူၺ်း။ တွၼ်ႈတႃႇတေပဵၼ်မႃးၸိူဝ်းၼၼ်ႉ ၵူႈၽၢႆႇၽၢႆႇ တေလႆႈၶဝ်ႈႁႃၵၼ် ၵႆႉၵႆႉမီးၶဝ်ႈႁႃဢွၵ်ႇၵၼ် သၢင်ႈလွင်ႈယုမ်ႇယမ်ၵၼ်ၶိုၼ်း ၵဝ်ႇႁဵတ်းမႂ်းႁဵတ်း ၽိတ်းၽိတ်းထုၵ်ႇထုၵ်ႇၼၼ်ႉ မီးတိုၼ်းမီးၵၼ်ၵူႈၵေႃႉ လိူဝ်ဝႃႈလူဝ်ႇမေႃဢဝ်ႁဵတ်းတွၼ်ႈသွၼ်ႁဝ်းမိူဝ်းတၢင်းၼႃႈၵူၺ်း။

                        တွၼ်ႈတႃႇ တေပဵၼ်မႃး လွင်ႈႁၵ်ႉႁွမ်ၵၼ် ယိပ်းမိုဝ်းၵၼ်လႆႈ မၼ်ႈမၼ်ႈၵႅၼ်ႇၵႅၼ်ႇၼၼ်ႉ ပုၼ်ႈၽွၼ်းမီးၼိူဝ် ၵူၼ်းၼုမ်ႇတႆးႁဝ်းလႄႈ မုၵ်ႉၸုမ်း တူင်ႇဝူင်းၵူၼ်းတႆး ဢိၵ်ႇပႃးသင်ႇၶၸဝ်ႈၶဝ်ၵူႈပႃးပႃးယဝ်ႉ. မဵဝ်းၵူၼ်းယိပ်းၵွင်ႈလႄႈ မဵဝ်းၵူၼ်းလဵၼ်ႈၵၢၼ်မိူင်း ဢၼ်ဝႃႈၼႆႉ ၵမ်ႉၼမ်ပဵၼ်ၵူၼ်း ဢႃႇယုယႂ်ႇဢွၼ်ႁူဝ်ၼမ် မၢင်ပွၵ်ႈ သဵင်ႁူဝ်ၸႂ် ၵႂၢမ်းၼႂ်းၸႂ်ႁဝ်း ဢၼ်ႁဝ်းႁွင်ႉပဝ်ႇလၢတ်ႈၼၼ်ႉ ၶဝ်တေဢမ်ႇငိၼ်းၵေႃႈၸၢင်ႇပဵၼ်လႆႈ သႃႇၽႃႇဝ ၵူၼ်းထဝ်ႈဢၼ်ဝႃႈၼႆႉ ပေႃးဢႃႇယုယႂ်ႇမႃး ဝူၼ်ႉသင်ၵေႃႈ ဢမ်ႇပေႃးပွင်ႇႁၼ်လီ ၊ ၸႂ်ၼိမ် ၊ တႃႇမူဝ်း ၊ ႁူဝ်ၵေႃႈတေဢမ်ႇပေႃးငိၼ်းလီ။ တႃႇၵၢၼ်တႆး တႆးမီးပုၼ်ႈၽွၼ်းတေလႆႈႁဵတ်းသၢင်ႈၵၼ်ၵူႈၵေႃႉ မီးငိုၼ်းၸွႆႈငိုၼ်း မီးႁႅင်းၸွႆႈႁႅင်း မီးၶၢဝ်ႇၸွႆႈၶၢဝ်ႇ မီးၽၵ်းၸွႆႈၽၵ်း မီးၶူဝ်းၸွႆႈၶူဝ်း မီးၵူၼ်းၸွႆႈၵူၼ်း ႁဝ်းမီးသင် ႁဝ်းပဵၼ်သင် ႁဝ်းလူဝ်ႇသင် ႁဝ်းမီးၼမ်ႉၵတ်ႉသင် သိုပ်ႇဢွၼ်ၵၼ်ၸွႆႈထႅမ်ႈၵၼ် တီးၵဝ်ဢမ်ႇမီး တီႈမႂ်းမီး မႂ်းသမ်ႉလူဝ်ႇၽိူမ်ႉပၼ်ၵဝ်ႇ တီႈၵဝ်ႇမီး တီႈမႂ်း ဢမ်ႇမီးၼၼ်ႉသမ်ႉ ၵဝ်တေလႆႈၸွႆႈထႅမ်ႈၽိူမ်ႉပၼ်မႂ်း လူဝ်ႇမေႃဢွၼ်ၵၼ်ႁဵတ်းပၼ်ပဵၼ်ၸုမ်း ပဵၼ် Team ယႃႇပေ ဝႆႉၸႂ်ဝႃႈ ဢမ်ႇမီးၵဝ်ဢမ်ႇပဵၼ် လူဝ်ႇမေႃဢွၼ်ၵၼ်ဝႆႉၸႂ်ဝႃႈ ၵၢၼ်တႆးၼႆႉ ပေႃးဢမ်ႇမီးတႆး ပေႃးဢမ်ႇမီးႁဝ်းႁႃးတၢင်းမူတ်း တိုၼ်းဢမ်ႇထိုင်တီႈလႆႈ ၼႆၼၼ်ႉၵူၺ်း။

• သႅင်သိုၵ်း
• www.saisengserk.com

Share:

Read More